John 13

Ísu kwená kwaási tísamairaꞋa nombá pétinkarain-kwasai.

1tíyótaasa í-tánón-kánáá aaváyaaraamba kwáyowana ívékaamba Ísu imáyáama éna séna marapáꞋá tuwéꞋa kesivonópaꞋa kuntauweréꞋa iyónaunda-kanaama kwétiye séna marapá-kwáásí kwenááima ísón-kwaasi ávááraumai imáyáama tiména miwíyáváíyé séna puwíníye súwana 2Sáátáánigo Sáímoni ááninkomba áwíꞋa Yútási Isakéríótimba Ísuna kuntaruꞋá uwó-ímáyáámá ámakowasa Ísuwe kwená kwayó-kwáásíyé toómbá kwénowana 3avowámá amápar-asirayamba ámakowana póna Áánútunopakemba kunkáunda póꞋa kuntauweréꞋa iyónaumne-imayaama Ísu éna póna 4toómbá némáyonkakemba usásinena paákákén-únánkwátói ayúꞋmarena táúri úsúmaena 5táávepimba nombá atímarena kwená kwayó-kwáásí tísamairaꞋa nombá pétinkena táúrinei uwátuwena 6Ísuma Sáímoni PítaanopaꞋa túwana séna Ísóigoo íma kesísamairaꞋa nombá pésinkaao súwana 7Ísu séna kemó úndama ívéꞋa íma kwéisaanda po aáno isáníyone súwana 8Pítaa séna kesísamairaꞋo nombó pésinkendayaveꞋa aꞋáo síma simaꞋa ónaumne súwana Ísu séna enaísamairaꞋo ímo nombó pérankaanamo éma kesí kwaási-iꞋa íma íníyone súwana 9Pítaa séna Ísóigoo ená kwaási-iꞋa ónáe súmpo sísamairare suꞋmai íma pésinkenda síyayaampakwara siꞋnómpákwáráꞋá nombá pésinkaao súwana 10Ísu séna nombó pékaawaimo ésa íma amápa-kuvaꞋa nombá peránááovo tísamairare suꞋmai nombá peránááowe. keinárawaꞋa nombá pétasaawana kímborawai íma nombá pékaiye súmba 11Ísu kwená kuntaru-kwáásígómbá ísarontavena séna keinárawaꞋa nombá pétasaawana kímborawai íma nombá pékaiye siráiye.

12Ísu simásuwena tísamairaꞋa nombá pétinkayuwena paákákén-únánkwátóimo ayúꞋmaromba maimái úmaena ménamo toómbó némáyopaꞋa kwéna tísaa ena séna kemó úndawaina ááimba ára kwéisaao. 13kentávéꞋa séꞋa amápa-tantaaꞋa agaráásinkaandawaima Ísóigoma ónemo sembá áraiꞋa mirán-kwáásímá úne. 14kemá kentí agaráátinkainaꞋa Ísóigoma póꞋa tísamairaꞋa nombá kwévetinkaundayaveꞋa kemá moórá-mora-umai nombá pétinkaaro. 15kemó kentí kwayóꞋó maráúndantemba keinárawakwaraꞋa mirán-oro. 16áraiꞋa simátimeꞋa séꞋa kwayó-kwáásímó ésa miwítí anón-kwaasigomba íma usáyaaitanaaowe. tiꞋmákaiwain-aai maimaésa kosimátímakaawaimo ésa tiꞋmákaiwaimba íma usáyaaitanaaowe. 17miráumai kemó uráunda áꞋa awánaraavo mirámó íyambo éꞋa tirumbá kaweꞋá ónááowe. 18keinárawapinkemba íma amáparawaiyaveꞋa súmpo ítátinkaunda-kwaasi áꞋa túyaraumne. Áánútun-aai aúváívimba agaimaréna séna kesé moórávinkembo toómbó naráiwaima kesí kuntaru-kwáásímán-iye agaimaréna siráimba áraiꞋa siráiye. 19íma paáruraisaꞋa simátimunda póna aánomo paárínaꞋa kentávéꞋa séꞋa áraiꞋa séna Áánútunopakemba kunkáiye sénááowe. 20áraiꞋa simátimeꞋa séꞋa tiꞋmáráanasa kwíyawai táái ísámai kaweꞋá íyanten-umai kesáái ísámai kaweꞋá ónááowe. kesááimo isáíyanten-umai siꞋmákaiwain-aai isánááowe Ísu siráiye.

moóráwai kesí kuntaruꞋá íníye Ísu siráin-kwasai.

Mátíyu 26:20-25, Mááka 14:17-21, Árúku 22:21-23

21Ísu simásuwena kwenarumbá umbaí tówana séna áraiꞋa simátimeꞋa séꞋa keinárawapinkemba moóráwai kembá namuro-kwáásíráꞋá agaráátinkaniye súwata 22kwená kwayó-kwáásí moórá-mora-umai méta kwenaúvínaayaivimba éta nááwantavena siíyó séta 23kwená kwayó-kwáásí Ísuma kembá arumbá símakowaima Ísuna egwaaꞋá máyaawanana 24Sáímoni Pítaa kentávéna aúwánáán-awaameꞋa éna séna nááwantavai seénó se áísaa uwo súwaꞋa 25avakáá-umai áísaa eꞋa séꞋa Ísóigoo emó sénda nááwaꞋiyo séwánana 26Ísu séna kemó toómbó nompí tuꞋmái aménaunda-kwaasi kwemán-iye séna toómbá maimaéna nompímbá tuꞋmái mindáꞋá Sáímoni Isakéríóti ááninko áwíꞋa Yútásimba amúwana 27mintómbá mayówana Sáátáánigo kwenarumpimbá iyúwana Ísu simámena séna emó ónáe sindaíꞋa maaránkaꞋa uwó Ísu súwasa 28toómbó kwénaapaꞋo máyón-kwaasi Ísumo sún-ainkona ááimba íma ísámai kawer-umbá 29sésa Yútási óntankaꞋa tavíkówaintavena Ísu séna ímo óísambo makáan-kwaasi évakaꞋa timiyó Ísu siyé sésa tanómbo káúvón-kanaaratavai sésa toómbá meéyán-uwo Ísu siyé suwaná 30Yútási Ísumo amún-tomba maimaéna avekáán-umai máápaꞋa kumúwana túnkuraiye.

aúná-amaambo simátímakain-kwasai.

31Yútási máápaꞋa kumúwana Ísu séna ívéꞋa kwaási úrandako súwíꞋa anómba umái kwévaarisana kesí mayáígómá Áánútu áwíꞋa anómba umái kwévaariye. 32kesí mayáígómá Áánútu áwíꞋa anómba intembá ívéꞋa Áánútu kesúwíꞋa anómba íníye. 33kesí iyámpóíyono. sáwíyankaꞋa kesé méꞋa tiyúwáanaꞋa sivakáá ónááowe. Yútaa-kwaasiyaveꞋo áꞋo simátimeꞋo súndantemba kentávéꞋa séꞋa íyóndaraꞋa íma kanaán-umai iyónááowe. 34aúná-amaamba simátíménaꞋa kesirumbó timúndanten-umai moórá-mora-umai kentirumbá tíméro. 35moórá-mora-umaimo kentirumbó timíyasamo ésa tuwánésa sésa Ísuna kwayó-kwáásín-owe sénááowe Ísu siráiye.

Pítaa ánaaemba umásinkaniye siráin-kwasai.

Mátíyu 26:31-35, Mááka 14:27-31, Árúku 22:31-34

36Ísu simásuwowana Sáímoni Pítaa áísaa ena séna Ísóigoo náávara iyíníyono súwana íyóndaraꞋa ívéꞋa íma sínaaemba kwaráníyompo aáno sínaaemba kwaráníyone súwana 37Pítaa séna Ísóigoo nóintavaiya ívéꞋa íma ánaaemba kwaránaumno. íma póꞋa áwaꞋnaa umai púwónana kaweꞋá íníye súwana 38Ísu séna áwaꞋnaa umai puwónaumnemo sénda kemá áraiꞋa simámeꞋa séꞋa kokórigomo ímo ááimo siráindaraꞋa kaumboráꞋá kentáváí séma íma awánáúnda-kwaasiye síníyone Ísu siráiye.